صينية الرز بالدجاج والقشطه

صينية الرز بالدجاج والقشطه

الطريقه شفتها في كتاب وصفات قشطة السعوديه .. وشكلها عجبني بس في النهاية  تجربتي ماطلعت نفس الصوره  أظن لأني كثرت كمية الرز

وماطلع عندي نثري

المقادير

للكريمه  والوجه / علبتين قشطه  , مكعب ماجي خضار , فلفل , ملعقة زيت , نص فص ثوم قد الفتفوته  ” وكالعاده اللي يحبه ممكن يستخدم فص كامل , بقسماط

للحشوه / 3 صدور دجاج مسلوقه ومقطعه , بصله متوسطه مفرومه , علبة ذرة صغيره ,  ملعقه صغيره كمون وكزبره وبابريكا  وملح حسب الرغبه

كوب ونص رز أبيض مسلوق = تقريبا 3 أكواب رز بعد السلق

الطريقه

لتجهيز الحشوه .. نقلي البصله حتى تبدي تشقر ونضيف عليها الدجاج والذره والبهارات ونقلبه 3 دقايق ونرفعه عن النار

لتجهيز الكريمه .. نحط ملعقة الزيت ع النار ونضيف عليها نص فص الثوم نحركه ونضيف علبتين القشطه ومكعب الخضار والفلفل ونحركه

بس يذوب  ونرفعه عن النار

نحط الرز في قاع الصينيه وعليه طبقة الحشوه ونصب فوقه الكريمه وننثر البقسماط عليه

 وندخله الفرن يخبز 20 دقيقه او بس يتحمر

ويقدم

سندويتشات الدجاج المكسيكي

سندويتشات الدجاج المكسيكي

الطريقه موجوده عندي من زمان وقلت اجربها بس ماادري هل هي فعلا خلطه تتبيل مكسيكيه او لا بس عموما
واحد من اخواني اللي عندهم ذوق في الأكل ويهتم يعطي رايه .. قال انه حلو .. بالنسبه لي كالعاده ماجربته
وانتوا احكموا

المقادير والطريقه

صدور دجاج ” او قطع لحم للي يحب ” مقطعه صغار نتبلها في ” نص كاس لبن , ربع كاس خل , وربع كاس ليمون , ربع كاس خل
ملح وفلفل وصلصة الصويا “

نتركها اقل شي ساعه وطبعا ككل التتبيلات كل مازاد الوقت كان افضل

في مقلاه نضع 3 ملاعق زيت ونضع الدجاج بماء التتبيله على النار

 ” ماي التتبيله كان وايد اللي فرنها كهرب
بيطول الموضوع عندها على ماينشف الماي وتبدي تقلي الدجاج ..
يوم حسيته طول عندي نقلته من فرن الكهرب الى فرن الغاز أسرع واللي تحب تختصر من الوقت
ماتحط كل ماي التتبيله

وبس يتقلى الدجاج ويخلص نكون مجهزين مكونات السندويتشات للف

خبز التورتيلا  جاهز تحصلونه بالسيفوي او بنده  او ممكن تسووه وسبق حطيت طريقته هنا بالمدونه

مايونيز , خس , شرايح فلفل أخضر حار , شرايح فليفله , جبن شيدر ” الأفضل لو تستخدموا جبن مكسيكي وكالعاده تحصلوه في السيفوي

ونلف السندويتشات وممكن اضافة الطماط  بس ماحطيتها مو الكل في البيت ياكلها

ونقدمها

نيوكي بصلصة الطماطم والريحان

نيوكي بصلصة الطماطم والريحان

بعدنا في المطبخ الإيطالي ” غرامي ” وهالطبق يعتبر نوع من أنواع الباستا بس بإضافة البطاطس وطبعا بما اني من محبات الباستا بأنواعها وصدري رحب للمغامرات والتجارب خخخخ ماخليت في خاطري وجربته ..
تقدروا تسووه في البيت مثل الطريقه اللي بحطها لكم الحين ” الطريقه خذتها من شانيل في منتدى شمواه ” أو تقدروا تاخذوه جاهز أتوقع تلقوه في السيفوي التميمي <<< حظهم اللي ساكنين عند السيفوي

المقادير

لكل 6 أشخاص

4 حبات بطاطس متوسطه مسلوقه ومقشره
4 أكواب طحين
بيضتين
ملح
4 ملاعق جبن برميزان مبشور ” يمكن الإستغناء عنه “

الطريقه

 نهرس البطاطس بشكل ناعم تماما بحيت ماتكون فيه اي كتله صغيره ونبشر البرميزان

 

وعلى الرخام نحط الطحين ونرش عليه الملح ونعمل حفره بالوسط نكسر فيها البيضتين

ونخلطها بالشوكه ونضيف الجبن والبطاطس المهروس ونعجن وننتبه لانكثر ولانبالغ في العجن حتى ماتصير العجينه لينه
“ونضطر نضيف طحين زياده .. “وفي حال صار هالشي مثل ماقلت لكم تقدروا تضيفوا شوية طحين

 

لين تجهز العجينه عندنا وتتشكل كوره بها الشكل ونتركها على جنب

نبدا نجهز الصوص

ناخذ 8 حبات طماطم نعمل فيها شق صغير سطحي بالسكين على شكل زائد
وننزلها بماي يغلي ونتركها حوالي ربع ساعه ونشيلها ونقشرها .. بتتقشر بسهوله من مكان الزائد اللي سويناه

ونخلطها في الخلاط حتى تصيرعصير ناعم بدون كتل

في مقلاه نحط شوية زيت زيتون + زيت نباتي حتى لايحترق زيت الزيتون لأن بسرعه ترتفع حرارته
ونضيف عليه حبه بصل مفرومه وفص ثوم صغير ” اللي يحبه يزيد فصين ”
ونقليهم شوي لين يذبل البصل ويبتدي يشقر شوي

ونضيف عليه الطماط اللي هرسناه في الخلاط ونتركه ع النار شوي
بعدين نضيف عليه 2 ـ 3 معجون طماط , مكعبين ماجي خضار وبهارات وكاس ماي

ونخلطه ونتركه ع النار لين يغلي وننزل ع النار لين تتكثف الصلصه وتجهز وقبل مانطفي عنها اخر شي نضيف
الريحان ” اللي ماعندها طازج وهو الأفضل ” تحط يابس وامرها لله

نرجع الحين لعجينة النيوكي
ناخذ جزء من العجينه ونفرده بشكل طولي ونقطعه قطع صغيره بالسكين على شكل مخدات صغيره

ونكرر العمليه لين يخلص كل مقدار العجينه
طبعا عندي طلعات اشكال واحجام غريبه لأني كنت مستعجله بس حاولوا لاتكبروا حجمها اكبر عن مفصل اصبع وبالشوكه نضغط على الحبات حتى تبين الخطوط فيها

 

اذا جهز نغلي مقدار من الماي بس يغلي نحط فيه الملح ونضيف حبات النيوكي
وننتظر بس تبدي تترتفع على وجه الماي يعني انها استوت وصارت جاهزه

 

نشيلها وعلى طول نحطها في الصوص مباشره

ونحط كل شوي مجموعه في الماي لين تخلص الكميه كلها

ونتركها في الصوص دقيقتين تتشرب به ونغرفها على طول في صحن التقديم ونرش عليها البرميزان ونزينها بالريحان

 

ملاحظه / البرميزان جبن ايطالي معتق يعتبر سعره غالي شوي ” الكيلو 95 ريال ” تلقوه بالسيفوي او حتى اسواق المزرعه مرات ينوجد في قسم الأجبان والمخللات .. في حال ماتوفر عندكم .. تقدروا تستخدموا بديل البرميزان ماركة فرشلي ” موجود في قسم الأجبان والمخللات بعد شفته في اسواق المزرعه <<< عن لااتعبكم تروحوا مشاوير تدوروا وينه :P

خبز الفوكاشيا

خبز الفوكاشيا

من أنواع الخبز الإيطالي  .. واللي عندهم مزاج ياكلوه كـ وجبه خفيفه مع الشاي  .. تقدروا تستبدلوا الأعشاب وتحطوا روزماري .. وممكن تستغنوا عن الاضافات الثانيه اللي هي الزيتون والطماط و البرميزان  وتكتفوا بالزعتر والاوريجانو …

المقادير

2كاس ونص دقيق
ملعقة خميرة
ملعقة سكر
2ونص ملعقه كبيرة زيت زيتون
رشة ملح
نص ملعقة صغيرة بيكنج باودر
كاس ونص ماء دافئ

وللوجه /  3 ملاعق زيت زيتون , ملعقة صغيره اوريجانو , ملعقه صغيره زعتر , برميزان مبشور

الطريقة 

نعجن مقادير العجينه  لين تصير عندنا كورة عجين ناعمه وملسا  ونتركها تخمر ويتضاعف حجمها  وبعدين نفردها في صينية فرن مدهونه ونتركها تتخمر مره ثانيه

وبأصابع اليد نعمل فتحات وندهن العجينه بالزيت زيتون  ونجهز المقادير اللي بنحطها على  الوجه

ندق الزعتر والملح الخشن والاوريغانو مع بعض ونرشهم على وجه العجين ونوزع قطع الزيتون والطماط الصغيره في الفتحات واخيرا نوزع البرميزان

وندخله الفرن نخبزه على حرارة 400 ـ 450  .. يعتمد على مدة حرارة فرنكم .. وبس يتحمر نطلعه  ويقطع ويقدم

كباب اللحم

كباب اللحم

هالوصفه يمكن مو جديده للأغلبيه .. الاغلبيه عندهم طريقتهم اللي يسوو بها الكباب .. حتى عندنا في البيت بالعاده اسوي خلطة اللحم ببهارات اكثر بس هالوصفه كانت عندي من زمان خذتها من أيام هجر من  المبدعو دمعة  أم البنين فقلت اليوم اجربها بما أن وصفاتها دائماً مميزه …. طبعا ظاهريا بالنسبه لي النتيجه حلوه بس لأني مو من معجبات اللحم اعتمدت لكم على كلام امي انه نفس مال المطعم .. بدون مبالغه في البهارات وانتوا جربوا بنفسكم وعلمونا النتايج  …

المقادير والطريقه

المقادير هنا تكون نظريه يرجع لتقديركم  للإضافات بالنسبه لكمية اللحم

*لحم مفروم أو دجاج مفروم

*بصل مفروم ناعم  .. بعد مانفرمه نتخلص من الماي اللي يطلع منه عشان  مايخلي اللحمه تتفكك من السوائل

|*فلفل أخضر حار مفروم ناعم

*ثوم  ” بالنسبه لي استخدمت فص واحد وفرمته ناعم جدااااا ” واللي يحب يزيد الكميه يرجع لذوقكم

*بياض بيضه

*بقسماط  تقريبا حطيت نص كاس أو اكثر بشوي

* البهارات ” كمون , كزبره يابسه , قرفه , ملح ”  فقط

~~ نخلط المقادير مع بعضها ونحاول ننشف  ماي اللحم قبل مانضيف عليه المقادير الثانيه  .. لازم الخلطه تكون ناشفه  .. ونجيب الأسياخ الخشب ونكبب اللحم عليها

وندخلها الفريز 10 دقايق او الثلاجه لوقت اللي بنسويها فيه .. واللي ماتحب تحطهم في اسياخ الخشب هذي خطوه اختياريه .. تقدر تكتفي بس انه تكببيهم  بشكل طولي

~~ الحين نجي لتسويتهم .. تقدروا بعدة طرق مو شرط تلتزموا باللي سويتها  .. ممكن تشووها على الشوايه الكهرب أو ع الفحم أو تحطوها بصينيه وتدخلوها الفرن او

على صاج او مقلى تيفال ع الفرن ..  وبالنسبه لي سويتهم على الشوايه الكهرب

بعد مانخلص الشوي .. نحط فحمه صغيره ع النار بعدين نحطها على قطعة قصدير في وسط اسياخ اللحم ونحط عليها نقطة زيت ونغطي اللحم تماما حتى يتبخر بالدخان  اللي يعطيه  ريحة الشوي المميزه

ونقدمها مع السلطه او بشكل سندويتشات  وبالعافيه

تهنئه رمضانيه

لكل الأحبه المتابعين هنا ….

رجعنا بعد الإنقطاع  لمشاركتكم بعض الوصفات والتجاربيه المطبخيه …. اخذني شغلي بالكيك ع الفيس بوك  حتى اشتقت اطبخ طبخات عاديه

والشهر الفضيل فرصه راحة من الكيك ونرجع للتجارب هنا … مااوعدكم ان كل الوصفات بتكون جديده بالنسبه للكل بس أتمنى أن الكل يستفيد منها

وكل عام وانتم بخير والله يعوده علينا وعليكم كل عام بحال أفضل من اللي قبله

ومتباركين بالشهر

Devil’s Food Cupcakes

Devil’s Food Cupcakes

 

 

الكب كيك هذا خذته بعد من موقع أجنبي من كيكات مارثا .. جتني طلبيه لكيك شوكولاته وحبيت اجرب طريقه جديده وخفت من المغامره ومايطلع حلو حزت الحزه واتورط بس الحمد لله طلع الكيك خيال .. للي يعشق اشوكولاته بيعجبه لأن طعم الشوكولاته فيه غني .. وخليط الكيك نفسه يكون هش وطري .. بس اهم شي انكم تستخدموا شوكولاته نوعيه ممتازه وكاكاو النوع الدارك مو الفاتح .. اما سبب التسميه ماادري ليش يمكن لأن الشيطان يحب الشوكولاته P:

 

المقادير

ثلاث ارباع كوب كاكاو بودره ” دارك ”

ثلاث ارباع كوب ماء حار

3 أكواب دقيق

1 م ص بيكنغ صودا ـ 1 م ص بيكنغ باودر ـ ملعقه وربع ص ملح

كوب ونص زبده ” 3 قوالب ”

4 بيضات كبار

كوبين وربع سكر

1م ص + م ك فانيلا سائله

كوب كريمه حامضه ” تلقونها في السوبر ماركت بإسم قشطة رائبه واذا ماحصلتوها استخدموا روب ”

 

الطريقة

1 ـ نخلط الكاكاو والماء الحار في طاسه حتى يصير ناعم .

2 ـ في طاسه ثانيه ننخل المقادير الجافه مع بعض ونتركها على جنب .

3 ـ نذوب الزبده والسكر على النار حراره متوسطه بس تذوب نرفعها عن النار ونخلطها في الخلاط على سرعه متوسطه حتى يبرد الخليط ولتسريع العمليه للي ماعندها صبر حطوها في الفريز دقيقتين بس تفتر ورجعوا اخلطوها في الخلاط .

4 ـ نضيف البيض وحده وحده ونخلط بعد كل اضافه عشان تمتزج البيضه في الخليط ونضيف الفانيلا وخليط الكاكاو .

5 ـ على سرعه بطيئه نضيف الطحين على دفعتين بالتبادل مع الكريمه الحامضه او الروب لين يمتزج الخليط بعد كل اضافه .

6 ـ نوزع الخليط في قوالب الكب كيك ونخبز على حرارة 350 في فرن مسبق التسخين .. لمدة 20 دقيقه .. ” لأن ادخل 3 صواني كب كيك اخذت ويايي 30 دقيقه

مثل كل مره اقول لكم يعتمد على حرارة فرنكم .

 

للتزيين

نغلي كوبين ونص كريمة + ربع كوب كورن سيرب ” موضروري اذا ماعندكم ”

ونضيفه على باوند من الشوكولاته ونتركه دقيقه بدون مانحركه لين نحس ان الشوكولاته بدت تذوب بعدين نحركه لين يذوب كل الشوكولاته ويصير عندنا شكله لامع

وندخله الثلاجه ونحركه كل 5 دقايق لين يثقل ويصير نقدر ندهن به الكيك .. بالنسبه لي ماخليته يثقل وايد حبيت يكون شبه سائل

ندهن الكيك ونبشر فوقه شرائح شوكولاته وبالعافيه