Archive for the ‘الكيك’ Category

كب كيك النوتيلا بالبندق

كب كيك النوتيلا بالبندق

بما اني صايره شاطره يوم اسوي هالكيك وصورت تقريبا كل الخطوات فما بهدر عليكم وعلى طول نبتدي

المقادير

 

 

 

قالب زبدة بحرارة الغرفه ـ كوب سكر بودره

ـ 2 م ك نوتيلا ـ 2 بيض ـ كوب وربع دقيق

ـ 2 م ك كاكاو بودره ـ نص م ص بيكنغ صودا

ـ 1 م ك بيكنغ باودر ـ علبة زبادي ـ

ربع كوب بندق مجروش ـ 1 م ك فانيلا والأفضل تكون السائله بس وقتها كانت مخلصه مني

 

الطريقة ..

نخفق الزبدة والسكر في الخلاط ثم نضيف البيض بالتدريج والفانيلا

ننخل المقادير الجافه مع بعض ونضيفها للخليط بالتبادل مع الزبادي وملعقتين النوتيلا واخر شي نضيف البندق المجروش بالسباتيولا او الملعقه الخشب

 

نوزع الخليط في قوالب الكب كيك

نخبزه لـ 30 دقيقه في فرن مسخن مسبقاً كالعاده ونجهز في هالاثناء التغطيه اللي بنزين بها

للتغطية ..

مثل متشوفون في الصوره بنحتاج الى .. ربع كوب نوتيلا , نص كوب شوكولاته ” احرصوا تستخدموا نوعية زينه مثل اللي بالصوره ” , نص علبة قشطة , ملعقة زبده ,نصف كوب مارشملو ” هالنوع اخذته على انه موجيلاتين بقري بس للإحتياط اللي تحب ممكن تستخدم بداله عسل ”

نخلط هالمقادير في حمام مائي حتى تذوب وتتمازج وتعطينا لمعه

ونتركها تبرد

نطلع الكيك من الفرن ونتركه يبرد وبعدين ندهنه بخلطة الشوكولاته

ونزينه بحلاوة التوفي المحشي بالبندق مثل اللي في الصوره او حبة بندق حسب رغبتكم

ونصفه في صحن التقديم وبالعافيه

كوفي كب كيك

كوفي كب كيك

لمحبين الكوفي هالكيك باين فيه طعم القهوه بشكل واضح بس ممكن يتخفف منها بزيادة حلاوة الكريمة مثل ماسويت .. الطريقه اللي ماخذتها تختلف شوي في التغطيه والكريمه بحيث تكون طبقة للتغطيه نشرب بها الكيك وكريمة للتزيين .. بس التغيير اللي سويته ان خليت خلطة التشريب هي الكريمة .. بعطيكم الطريقه الاصليه والإختلاف البسيط اللي غيرته وانتوا جربوا اللي تحبون او للتغيير جربوا الاثنين ..

المقادير ..

4 بيضات _ كوب ونص سكر

نص كوب زيت _ كوبين دقيق

1 م ك بيكنغ باودر _ 2 م ك نسكافيه

كوب حليب

** نخلط البيض والسكر حتى يميل لونه للأبيض بعدين نضيف الزيت ” ممكن نستبدلها بزبده “

** ننخل المواد الجافه مع بعض ونضيفها بالتناوب مع الحليب وكالعاده لازم نبدأ بالطحين وننتهي به 

** نوزع خليط الكيك في قوالب الكب كيك ونخبزها في فرن مسخن مسبقا على حرارة 350 وبياخذ حوالي نص ساعه ونطلعه ونتركه يبرد

 

للخلطه / علبة قشطة , 2 م ك نسكافيه , 1 دريم ويب , ثلثين اصبع زبده مذوبه ,سكر بودره حوالي الكأس ” تزيدون وتنقصون على حسب ذوقكم في حلاوتها “

** نخلط هالمقادير مع بعض ونعمل فتحات في الكيك ونشرب الكيك بالخلطه

( التغيير اللي سويته اني خليت الزبده بحرارة الغرفه وخفقت المقادير كلها في الخلاط حتى انتفشت وصارت كريمه دسمه وزينتها بها واستغنيت عن الخطوه الأخيره )

الخطوه الأخيره / بعد تشريب الكيك بالخلطه , نخفق كريمه خفق حتى تنفش ونحط عليها ملعقة من خلطة التشريب ونقلبه بالملعقه مو الخلاط حتى مايطلع الهوا من الكريمه وتسيح

ونزين بها الكيك ونرش فوقها شوي كاكاو ..وبالعافيه

كب كيك جوز الهند

كب كيك جوز الهند

بما انه وايد يحبون كيك جوز الهند وفي الطريقه اللي حطيتها قبل كان لازم نستخدم جوز الهند الرطب وهذا مو متوفر دايم فدورت طريقه ثانيه وجربتها وطلعت حلوه وهشه وطريه وريحتها حلوه وحليب جوز الهند مركز النكهه فيها + الكريمه فيها جوز هند + كرة جوز الهند اللي نزين بها يعني نكهة جوز الهند مو دبل بس الا تربل جربوها وبتعجبكم ..

 

وهذي المقادير بالطريقه

اصبع زبده +كوب سكر
واخفقيهم مع بعض
اضيفي عليه
2 بيض
وشوي فانيلا سايله
وخليها لين تنتفش شوي
اضيفي نصف كوب جوز الهند
وكوب ونص دقيق وملعقه صغيرة بيكنج بودر
بالتبادل مع علبه زبادي بالنسبه لي ماكان متوفر وقتها واستخدمت كاس لبن
جيبي ملعقه حليب جوز الهند وضيفي عليها 3 ملاعق حليب واخلطيه لين يذوب ( هذا في حال كان مسحوق بودره بس اللي كان عندي حليب جوز الهند السائل ماركة فرشلي فااستخدمت 3 ملاعق منه )
وضيفيه على خليط الكيكوزعيه بالقوالب
مانملاها ع الاخر عشان ماتنفش زياده وتطلع من الكب ونخبزها من 25 الى 30 دقيقه

ونطلعها ونتركها تبرد .. لاتستعجلوا عليها مثل ماسويت وتسيح عليكم الكريمه  

 

للزينه //
نخفق كوب كريمه خفق لين تثقل
ونضيف لها ملعقتين سكر ناعم
وملعقتين جوز الهند
وشوي فانيلا
ونقلب
ونزين فيه الكيك بعد مايبرد الكيك

 

وكور جوز الهند
عباره عن:

كاس حليب بودرة
ثلاث ارباع كاس سكر بودرة
كاس جوز هند
علبه قشطه ( ضفت المقدار كامل وحسيتها مايعه شوي فزدت كميه جوز الهند لين حسيتها صارت تنعجن عدل

او تقدروا كل شوي تحطوا قشطه اذا حسيتوها صارت تتشكل مثل العجينه وقفوا )
اعجنيها وكوريها

 


وبالعافيه 

كب كيك المحشي

كب كيك الشوكولاته والمارشملو

هالكب كيك سهل وتقدرون تبدعوا فيه لأن فكرته تعتمد ع التزيين والسر كله

في صلصة الشوكولاته اللي تعطيه طعم مميز والأهم ان الشوكولاته المستخدمه

فيه تكون من نوعيه ممتازه مثل ماقلت لكم من قبل حاولوا لاتستخدموا الا

شوكولاته ممتازه مثل ليندت اللي حاطه لكم صورتها او اي نوع شوكولاته يكون نسبة الكاكاو فيه عاليه من 65 % وفوق وبتلاحظوا الفرق حتى في تذويبها

وابتعدوا تماما عن الجالكسي


المقادير والطريقة:


كيك فانيلا بيتي كروكر او اي كيك تسوونه بالنسبه لي سويت كيكة الزبادي

 

للتزيين:

صلصة الكاكاو:
نصف كوب كاكاو خام في حمام مائي مع ملعقة زبدة،ملعقتين نوتلا
ثم نضيف علبة قشطة وملعقةطعام عسل
ميني مارشملو

 

الطريقة:

ـ .بعد أن يبرد الكب كيك يفرع من الوسط


ثم يحشى بصلصة الكاكاو
ــ يزين بحبات من الميني مارشملو ويمكن نحط فوقهم خطوط من صلصه التوفي

 

Chocolate Cream Cake

Chocolate Cream Cake
 
 
الكيك شفته في هجر وعجبتني الفكره وسويت وحده جان استانس واقوم اسوي 3 منها
ثنتين للتوزيع ووحده للبيت والتزيين على كيفكم تخترعوا فيه .. الطريقه الاصليه بس مبشور شوكولاته
بس كان عندي شوكولاته ام اند امز ملون وزينت به تقدرون حتى تزينون بالكريمه
بكيس التزيين <<< Confused smileالناس عطوا الكيكه اول بعدين يتكلموا في التزيين
 
خذوا الكيكه
 
نسوي كيك شوكولاته سواء من عندنا في البيت او كيك الكرتون بيتي كروكر
وطبعاً هذي الأسرع وطعمها حلو
 
بعد مانطلعها في الفرن نفرغها في الوسط بالملعقه
عاد مو تفرغوها وتطيروا الكيكه كلها
 
 
الحين ناخذ الكيك اللي فرغناه ونحطه في الخلاط + علبة قشطة + ظرف دريم ويب + نص كاس
حليب سائل + 3 ملاعق حليب بودره + ملعقة نسكافيه
وبيصير عندنا خليك كريمي ثقيل انتبهوا لاتخلطوه بزياده ويصير خفيف تصير لكم الكريمه سائله
 
 
نصب خليط الكريمه في وسط الكيكه المفرغه  ونزينها مثل مانحب
ونبردها في الثلاجه
 
 
وبالعافيه
 
 

كب كيك الجبن باللوز والقرفه

كب كيك الجبن
 
 
هالكيك يجنن أحس طعمه خيالي مثل الاسفنجه لذيذ .. هذا رأيي طبعا لأن أحب الكيك اللي يكون فيهم
دارسين .. بس جربوها ماراح تندموا
وعلشان خاطر عيون أنوار هذي هي الطريقه
 
المقادير
 
بيض 3
كاس ونص سكر
كاسين دقيق
ملعقة ك فانيلا
ملعقة ك بيكنغ باودر
علبة قشطة
كيري 4 حبات
رشة ملح
 
للتغطية / كوب لوز شرائح , نص اصبع زبدة , 2 ملعقة عسل , ملعقة قرفة " دارسين" , 4 ملاعق قشطة
 
 
الطريقه
 
نخلط البيض مع السكر حتى يتغير لونه ويصير باهت وبعدين نضيف عليه الفانيلا
نضيف الدقيق والبيكنغ باودر بالتبادل مع القشطة والجبن
نوزع الخليط في قوالب الكب كيك ونخبزه لـ 25 _ 30 اوحتى ينضج على حسب فرنكم
 
ونجهز التغطيه / نسخن على النار جميع مقاديرها لين تتمازج وتذوب الزبده وأخر شي
نضيف شرائح اللوز ونرفعه عن النار على طول ونتركه يبرد
 
نطلع الكيك من الفرن ونوزع مقدار ملعقة من خلطة اللوز على الكب كيك
ونرجع ندخله الفرن من فوق بس دقايق حتى يشقر اللوز شوي
وممكن نستغني عن هالخطوه
 
ويقدم الأفضل دافئ
وبالعافيه
 

كيكة الكريم كراميل بالقهوه والشوكولاته

كيكة الكريم كراميل بالشوكولاته
 
 
من قروب الفيس بوك احلى الوصفات من مطبخنا
 
 مابهدر عليكم هالمره وعلى طول نبدي
المقادير والطريقه
 
 
مثل ماتشوفوا في الصورة .. بس باقسم ليكم المقادير على حسب الخطوات
 
علبة كيك بيتي كروكر للطبقة الأولى نخبزها ونفتتها ونرصها.. في قاعده صينية متحركه * علبة الكيك تكفي صينيتين من الحجم الوسط
 
الطبقة الثانيه علبة بسكويت شاي + علبة قشطة + ملعقة كبيره نسكافيه نخلطها في الخلاط الموس ونتركها على جنب
ونسوي الخطوه الثانيه نحط في قدر صغير علبتين الكريم كراميل + كاس وربع ماي +4 ملاعق حليب بودره
ونذوبها ونتركها لين تغلي ونرفعها عن النار ونصبها على خلطه البسكوت والقشطه في الخلاط
ونخلطها مع بعض ونصب الخليط على طبقة الكيك
 
 
وندخلها الثلاجه تبرد وتتماسك ماتطول واجد ونسوي في هالوقت الطبقه الثالثه
 
نذوب جالكسي مع علبة قشطه ونطلع الكيك من الثلاجه ونحط هالطبقه الأخيره عليها ونرشها بشوكولاته
مبشور او فليك مفتت  ونرجعها تبرد لوقت التقديم
 
وبالعافيه