Archive for the ‘الخبز والمعجنات’ Category

لف المعجنات

اليوم جايبه لكم طرق للف الفطاير والمعجنات .. شفتهم في المنتديات وطبقتهم بس يبغى لهم بال … سويت بهم السويس رول واصابع القرفه وفطاير لحم

طبعاً انتوا تاخذوا الفكره وتطبقوها على الحشوه اللي تبغوها سواء حلى او مالح

لأصابع القرفه .. نفرد العجينه وندهنها بالزبده بس نخلي الاطراف بدون دهن عشان تلزق على بعضها  ونرش عليها السكر البني والقرفه

نطبقها على بعض  بهالطريقه  ونقطعها  بشكل طولي

ونلف كل مستطيل بشكل متعاكس

وهذا شكله بعد الخبز حطيت عليه صوص الهيرشي  شوكولاته والكراميل

تقدروا تستخدموا نفس الفكره  على حشوة الزعتر

~~~~~~~~

“2 “

هالطريقه  بالأساس  اللي خذتها من عندها كانت حاطه حشوه مالحه لبنه وزيتون او زعتر نسيت بس كنت مسويه سويس رول وقلت اجربها  طلعت حليوه بس صارت عملاقه لأني

ماقسمت العجينه بس انتوا خذوا الفكره وضبطوها  لأن شكلها حلو

نفرد العجينه بشكل مستطيل كبير وندهنها بالحشوه اللي نبغاها ونلفها رول مثل مانسوي السينابون ونقطع بالسكين بس بدون مانوصل للطرف  بهالشكل

ونبتدي نعاكس الحلقات وحده نخليها مثل ماهي والثاني نرفعها للجهه الثانيه بهالشكل

ونخبزها طبعا المفروض ماوريكم نتيجتي لأن مثل ماقلت لكم طلعت عملاقه عندي  بس للأمانه  بضحي واوريكم 😛

~~~~~~~~

“3 “

وهذي للفطاير والتسميه من عندي  .. نسيت  وماصورت الا خطوه وحده بس ان شاء الله تكون  واضحه تبين الفكره

نحشي الفطاير بشكل كوره عادي  وبعدين ناحذ قطعتين صغار  من العجينه نلفها على شكل اسطواني  ونجدلها  بلف الخيطين على بعض  بهالشكل

وناخذ الجديله اللي عملناها ونحطها مثل التاج فوق  الفطيره وندخل الاطراف تحت حتى ماتنفتح اذا خبزناها .. ان شاء الله وضحت الفكره  وتبين من النتيجه النهائيه

Advertisements

خبز الفوكاشيا

خبز الفوكاشيا

من أنواع الخبز الإيطالي  .. واللي عندهم مزاج ياكلوه كـ وجبه خفيفه مع الشاي  .. تقدروا تستبدلوا الأعشاب وتحطوا روزماري .. وممكن تستغنوا عن الاضافات الثانيه اللي هي الزيتون والطماط و البرميزان  وتكتفوا بالزعتر والاوريجانو …

المقادير

2كاس ونص دقيق
ملعقة خميرة
ملعقة سكر
2ونص ملعقه كبيرة زيت زيتون
رشة ملح
نص ملعقة صغيرة بيكنج باودر
كاس ونص ماء دافئ

وللوجه /  3 ملاعق زيت زيتون , ملعقة صغيره اوريجانو , ملعقه صغيره زعتر , برميزان مبشور

الطريقة 

نعجن مقادير العجينه  لين تصير عندنا كورة عجين ناعمه وملسا  ونتركها تخمر ويتضاعف حجمها  وبعدين نفردها في صينية فرن مدهونه ونتركها تتخمر مره ثانيه

وبأصابع اليد نعمل فتحات وندهن العجينه بالزيت زيتون  ونجهز المقادير اللي بنحطها على  الوجه

ندق الزعتر والملح الخشن والاوريغانو مع بعض ونرشهم على وجه العجين ونوزع قطع الزيتون والطماط الصغيره في الفتحات واخيرا نوزع البرميزان

وندخله الفرن نخبزه على حرارة 400 ـ 450  .. يعتمد على مدة حرارة فرنكم .. وبس يتحمر نطلعه  ويقطع ويقدم

المافن المالح

المافن المالح

هالعجينه شفتها مره بالصدفه بحوستي في النت تنفع اذا بتسوون بيتزا ع السريعه بدون تخمير .. خلطتها تكون شبه سائله مثل خليط الكيك وممكت تسوونها في صينيه كامله او على شكل مافن وتستخدموا اوراق الكب كيك بس ماانصحكم بعد تحطون الورق .. لما جربتها به هالمره بعضهم تداخل العجينه مع قوالب الورق … يعني الاحسن تدهنوا صينية قوالب الكيك بالزيت مباشرة افضل .. والحشوه تقدرون تشكلون فيها .. بعضهم استخدمت فيهم كيري وبعضهم جبن شيدر حبيته اكثر بالشيدر وتقدروا طبعا تنوعوا بالاضافات حسب ذوقكم ورغبتكم ..

 

 

المقادير :

1/4 كوب دقيق
1/4 كوب زيت
1/4 كوب ماء
1/4 كوب حليب بودره
1 ملعقه شاي بيكنج بودر
2 بيض
رشة ملح

الحشوة :

زيتون , فليفله , جبن كيري او شيدر , زعتر

 

الطريقه :

نخلط مقادير العجينه في الخلاط حتى تصير شبه سائله مثل خليط الكيك ونوزعها في صينيه الكب كيك بعد ماندهنها بالزيت

نوزع الحشوه ع الخليط ونرش الوجه بالزعتر وندخلها الفرن نخبزها

لين تتحمر بتاخذ نص ساعه او اقل على حسب حرارة فرنكم

وتتقدم بالعافيه مع الشاي

فطائر تركيه

فطائر تركيه

الطريقه مثل مااخذتها من صاحبتها نجود

مقدار العجينة :2 كاس دقيق ابيض , نص كاس دقيق اسمر ( حسب الرغبة ممكن ابيض فقط )

كوب حليب دافي

ملعقة خميرة

رشة ملح

ورشة سكر

 

الحشوات :
1: بيضة , جبنة بيضا مالحة , ملعقتين حليب بودرة ..( بالخلاط ثم يضاف لها بقدونس مفروم )
ورشة سمسم بعد ماتحشى بالفطائر .

2: لحم مفروم مع بصل يقلب ع النار لين يستوي , ثم في قدر اخر يضاف بصل وشوي زيت وطماط مقطع صغير .. خمس دقايق بس ع النار ثم يضاف له الحم المستوي
ورشة فلفل اسود , وكمون , وملح .



اخر خطوة : تدهن بزيت الزيتون بالفرشة وتدخل الفرن

.

* نقطه مهمه / الفطاير هذي ماتحتاج وقت طويل في الفرن وفرقها عن الفطاير العاديه انها ماتنتفخ يعني بس نشوفها تحمرت على خفيف من تحت نطلعها من الفرن على طول

لأنها بتطلع جافه مثل البسكوت بس تطول شوي .. احنا البيت حبوها بهالشكل وهي تقرمش وانتوا واللي تفضلونه

تقدم بالعافيه

فطائر الجلاش

فطائر الجلاش
 
 
هذي سلمكم الله كنت سهرانه كالعاده وطلعت من الغرفه الصباح افرفر في التلفزيون
جان اشوف برنامج منال العالم وشفتها مسويه هالاخترع وحطيتها في بالي باسويها
ولما قعدت رحت طلعت عجينة الجلاش اللي عندنا جان يطلع تاريخ صلاحيتها منتهي من سنتينConfused smile تخيلوا
احنا مانستخدمها .. امي تقول اول كانت تسوي بها بس من سنين الدبس هونت واني مامره جربتها
بس ابوي يحب يجيب اغراض على مايشتهي
وامس خليته يجيب لي العجينه جديده وسويتها مع ان اخوتي مايحبوا هالاختراعات بس ماعندي احد
اجرب فيه فهم مضطرين .. بس الحمد لله انأكلوا حتى اللي توقعته مايقرب حتى منها طلع اكثر واحد اكل
 
وهذي المقادير مع الطريقه
 
 
علبة من عجينة رقائق الجلاش
اصبعين زبده مذوبه
والحشوة / طريقتها .. نقلي بصل مفروم ونحط عليه اللحم المفروم او دجاج مفروم >> مثلي ,, والبهارات ونشيله عن النار
ونسلق شوية مكرونه ونحط عليها اللحم المفروم ونبشر عليهم حوالي ربع كوب جبنة برميزان + جزر مبشور + فليفله
خضراء مقطعه صغار + ملعقتين كبار جبن سائل
 
 
ناخذ شريحه من الرقائق وندهنها بالزبده ونحط عليها الشريحه الثانيه وندهنها
 
 
نحط الحشوة داخلها ونسكرها وندهنها بعد مانسكرها
ونحطها في الصينيه .. استخدمت الصواني الصغار بس ممكن نسوي الرقائق في صينية كبيرة كامله
او ممكن تسكروها مثل مربعات المطبق .. يعني هالشي راجع لكم
 
 
ندخلها الفرن ونخبزها بس تتحمر ونطلعها
 
وبالعافيه
 
 

الخبز البلغاري

الخبز البلغاري
 
 
هالخبز سويته بس لأن شكله عجبني بس طلع طعمه حلو كأنه خبز على بصل
ونبدأ بــ
 
مقادير العجينه
 
كاس ونص حليب سائل
بيضتين
دقيق 4 كاسات >> اني احتجت أكثر .. يعني على حسب نوع الدقيق اللي بتستخدموه
ضيفوا لين تحسوها صارت مضبوطه
ملعقة ونص خميرة فورية
ثلاث أرباع فنجان القهوه الصغير سكر
ملعقة صغيرة ملح
وثلث كوب زيت
 
 
الطريقه
 
نخلط المقادير الجافه وبعدين نضيف عليها المقادير السائله ونبتدي نعجن لين تتكون العجينه
وكلما طالت مدة العجن كان افضل
ونغطي العجينه ونتركها تتخمر 
 
في هالوقت نبتدي نجهز الحشوة // بصله مفرومه , اصبعين فلفل أخضر حار , 8 حبات كيري
 
 
نقلي البصله في شوية زيت حتى تذبل وتشقر ونحط عليها الفلفل والجبن ونحركه حتى يتمازج مع بعض ونرفعه عن النار
بيحتاج دقيقتين بالكثير
 
 
ونرجع للعجينه بعد ماخمرت ونقسمها 4 أقسام
 
 
وكل قسم 4 كرات = 16 كورة << طلع عندي 20 كورة لأن زدت في مقدار الطحين
ونغطيها لاتجف
 
 
نبدأ نفرد اول كورة وندهن وجهها بزيت زيتون ونفرد الكورة الثانيه ونحطها على الأولى
وندهنها والثالثه والرابعه نفس الشي بتصير مثل الطبقات عندنا
بس الرابعه ماندهن وجهها بزيت زيتون مثل الباقي
 
 
 
ونحط شوي من حشوة الجبن على طرفها ونلف مثل السويسرول
 
 
ونقطعها بهالشكل
 
 
ونكمل باقي الكرات بنفس الطريقه ونقطعها ونصفها في صينية فرن مدهون بزيت زيتون
وندهن الخبز بالحليب ونرشه بالسمسم ونتركه يرجع يختمر 10 دقائق
 
 
ندخله الفرن ونخبزه ونحمره ويقدم بالعافيه
 
 

سندويتشات الكودو

سندويتشات الكودو
 
 
هالسندويتشات شفت طريقتهم من سنييييين في هجر وسويتهم وقتها بس مارجعت عدتها مع انهم كانوا حلوين
عاد شفت ابويي جايب كيس صمول والحين رمضان يعني اذا ماشفت له طبخه بيظل وييبس حرام
فعلى طول خطرت على بالي هالسندويتشات وسويتهم
 
بس هالمره ردت الفعل من البيت كانت أفضل واحد من اخواني عجبته عدل
هي تقريبا تشبه للشوارما او الكودو ماادري جربوا واحكموا المهم ان الطعم حلو وماعليكم من الاسم
 
 
الطريقه
 
بنحتاج إلى كيس صمول  بناخذ الصموله ونقصها نصين ونفرغها مثل الصوره
 
 
الحين نجهز الحشوه // نسلق صدور دجاج بعد ماتستوي نفللها باليد
وعلى النار نقلي بصله متوسطه مفرومه بس يصير لونها ذهبي نحط الدجاج
ونقلبه شوي ونحط عليه البهارات والملح ونقلبه سريع ونضيف فليلفه خضراء مقطعه صغار
 
ونضيف عليه علبة قشطة + 2 ملعقة جبن سائل ونقلب الدجاج حتى ينخلط
 
 
نحشي السندويتشات بحشوة الدجاج ونصفها في الصينيه ونوزع جبن شيدر مبشور على وجه كل خبزه
 
 
ندخله الفرن بس يذوب الجبن ونطلعه ويقدم وبالعافيه