Archive for the ‘الحلى’ Category

كيكة البونتي

كيكة البونتي

هالكيكه  روعه للي يحبو شوكولاته باونتي وجوز الهند ” فديت روحهم الغاليين اللي يحبو جوز الهند ” وبارد ومنعش في هالحر .. جربناه في اخر قعده لنا مع البنات في بيت صلحيه .. هالقمر كله مدلعتنا ومدللتنا تسلم ايدها .. وخذنا الطريقه منها .. جربوا واحكوا ..

بس الفرق هي طبقت الكيك خلتها مفتته ورصتها مثل الجيز كيك .. بس لما سويتها خليتها مثل ماهي .. وسويت خطأ  اني حطيت طبقة جوز الهند قبل ماتبرد الكيكه فصارت رطبه من تحت بس عموما ماخرب ع الطعم ..  واذا تبغوها مثل الاييسكريم تقدروا تستبدلوا الطبقه الاخيره بشوكولاته مذوبه مع قشطه وبردوها في الفريز >> ماجربتها بس اتوقع بتطلع تمام  ..

المقادير + الطريقه

الطبقة الأولى .. كيكة بنيه تقدروا تسووها او تستخدموا كيك بيتي كروكر شوكولاته  نخبزها ونتركها تبرد

الطبقة الثانيه… في قدر نحط ” كاسين جوز هند + كاسين حليب + 3 ملاعق سميد + نص كاس زيت + بياله سكر ” ونحركه ع النار بس يغلي ويثقل نرفعه ونصبه على طبقة الكيك ونترتبه بالملعقه

الطبقه الثالثه .. في قدر نحط  ” ظرف كريم كراميل + فنجان سكر + علبة قشطة + 3 ملاعق كاكاو + كاس حليب ” نذوبهم على النار وبس يغلي نرفعه ونصبه بحذر على طبقة جوز الهند وندخله الثلاجه يبرد  لحين وقت التقديم وبالعافيه

Advertisements

ميني تارت التوفي

ميني تارت التوفي

هالحلى عطتني طريقته من زمان  صديقتي الصدوقه اشراف  من سنين واول ماجربته الكل طاح في غرامه بس وقفت ماسويه وامس واني ادور في دفاتري

لقيته ورجعت سويته ولازال الكل يقع في غرامه .. بس حسيت هالمره طعم الحليب باين شوي  يمكن استعجلت عليه او بسبب نوعية الحليب بالعاده استخدم نستله المركز المحلى

هالمره استخدمت نوع ثاني فيلور  .. المهم ندخل ع الوصفه

المقادير والطريقه

للتوفي / علبة حليب مركز محلى كبيره

نحطها العلبه وهي مسكره  في قدر  ونغطيها بالماي وعلى النار ونتركها 3 ساعات وكل ماحسينا الماي نقص نرجع نزيد ه ..

لعجينة التارت  /  اصبع زبده بارد مقطع مربعات , كوب طحين , نص كوب سكر بودره , رشة ملح , صفار بيضه , فانيلا سائله

نعجن المقادير مع بعض .. عندي طلعت الزبده شوي لين فااضطريت ازيد شوي طحين .. نجمع كورة العجين ونغلفها بالبلاستيك ونتركها ترتاح 10 دقايق في الثلاجه

ونطلعها وناخذ مقدار كورة صغيره من العجينه ونوزعها بالاصابع في قوالب صينية الكب كيك او الميني كب  ” المقدار الواحد يسوي تقريبا 12 حبه في صينية الكب الحجم العادي

ونعمل فيها فتحات بالشوكه 

\

 .. ونخبزها لين تتحمر ع الاطراف ونطلعها ونتركها تبرد تماما

 وبعدين نقلب الصينيه ونطلع قوالب التارت

نفتح علبة الحليب المركز بعد ماشلناها من على النار وتركناها تبرد بتكون صارت توفي وثقلت ونعبي التوفي في كيس بلاستيك او قمع ونوزعه في التارت

 

ونزينه بالمكسرات .. احب الفستق لأنه يعطيه لون حيوي 

ويقدم مع القهوه

كيكة باسكن

كيكة باسكن

 

هالكيكه سهله جداً وتعتبر سريعه خاصه اذا استخدمتوا كيك جاهز او سويس رول وشكلها حلو وبارده تسرسح على القلب مثل مايقولون في حر الصيف اسمها باسكن يمكن علشان طعمها يشبه للإيسكريم .. بالعاده اسويها على كيك شوكولاته بس هالمره حبيت اغير الشكل واستخدمت سويسرول الشوكولاته مال امريكانا .. وطلعت النتيجة حليوه

 

المقادير

 

كيك سويسرول ” او كيك شوكولاته تسوونه بالبيت او حتى بيتي كروكر

لخلطة الايسكريم / علبتين كريم كراميل .. ظرف دريم ويب .. علبة قشطة .. 3 ملاعق حليب بودره .. بيالة ماي بارد

شوكولاته مبشور او جالكسي فلوتات او اي نوع تفضلونه .. بالنسبه لي استخدمات حبيبات هيرشي

 

 

الطريقه

 

** نغلف طاسه بالبلاستيك او القصدير

** نقطع السويسرول الى شرايح ونصفها على جدار الطاسه بطريقه مرتبه

** نخلط مقادير الايسكريم في الخلاط حتى يثقل وينفش ونصب نص مقدار الكريمه على السويسرول ونوزع الشوكولاته فوقها واذا حبينا نقطع كيك ونوزع منه شوي ونصب باقي مقدار الكريمه واخر شي نصف باقي السويسرول ونغطيها بالبلاستيك وندخلها الفريز ليله كامله عشان تجمد

** نطلعها قبل التقديم مباشره ونزينها ” بس لاتزينوها نفس التزيين العالمي اللي سويته هنا وخربتها ”

جيز كيك التمر

جيز كيك التمر
 
 
هالجيز ماخذتنه من قروب أحلى الوصفات في الفيس بوك كل يوم اقول باسويه لين اليوم أخيراً عزمت وسويته + 4 كيكات
انواع الجيز السريعه هذي تصلح اذا تبغون حلى سريع او جايينكم ضيوف
ماتاخذ جهد ولا وقت طويل
 
الطريقه
 
الطبقة الأولى / كالمعتاد بسكويت مطحون + زبده مذوبه ونرصه في قاعده الصينيه
 
الطبقة الثانيه  / في الخلاط 10 تمرات + علبة قشطة + علبة حليب مركز محلى + بيضتين
كيري 9 حبات + 1 م ك نسكافية
 
نصبه الخليط السائل على البسكوت وندخله الفرن حتى يتماسك الخليط ويتحمر شوي من الجوانب
ونطلعه يفتر شوي وندهن الوجه بشوية عسل او سيرب البان كيك
ونرش عليه شرائح اللوز
 
وبالعافيه
 

جيز كيك الجالكسي

جيز كيك الجالكسي
 
 
ماادري ليش اسمها جيز كيك جالكسي وهو مو موجود فيها الا للتزيين بس يالله المهم الطعم
 
الطريقه
 
الطبقه الأولى / بسكويت محطونه + زبدة مذوبه نرصهم في قاعده الصينيه زين
 
الطبقه الثانية / 6 حبات كيري + علبة قشطة + 1 م ك سكر + 1 م ك بيكنغ باودر + بيضه
نخلطهم في الخلاط الكأس او الموس ونصبهم ع البسكوت وندخلهم الفرن نص ساعه
 
الثالثه / كاس حليب + ظرف كريم كراميل + 3 ملاعق كاكاو بودره
نحطهم على النار لين يغلي الحليب ونشيلهم بيكون عندنا خليط سائل بس ثقيل شوي
نصبهم ع الجيز بعد مانطلعه من الفرن ويفتر شوووي بس
وندخله الثلاجه يبرد
 
ونبشر فوقه جالكسي
وبالعافيه
 

مهلبية الورد

مهلبية الورد
 
 
المقادير
  كيس شعيرية باكستانيه
 كوبين ونصف حليب بودرة
نصف كوب ماء ورد واضيف له نقطه من ملون طعام أحمر << مو لازم
 كوبين سكر
 ليترين ماء = 8 كاسات ماء
ثلاث ملاعق نشا
شوية هيل .. حتى لورشه خفيفه بس تفرق بالطعم
وفستق للتزيين
 
الطريقه
 
نخلط الحليب والماء والسكر ثم يوضع على النار
عندما يغلي الحليب تكسر الشعيريه وتوضع عليه مع الهيل .
تترك لتغلى وتنضج الشعيريه
نخلط النشا مع ماء الورد ويوضع على الشعيرية
نقلبه لين يثقل  وبعدين نحط شوية ماء ورد زياده قبل لانطفي عنه.
نحطه في الأطباق ونرش عليه الفستق وبالعافيه
 

بسبوسة الجالكسي

بسبوسة الجالكسي
 

هالبسبوسه صايره موضه السنه وكل مادخل موقع للطبخ تكون موجوده فيه وقررت أخيراً أطبقها بس طلعت حاميه المره الجايه بقلل كمية السكر والحليب المركز بتطلع احلى بوايد أكيد بس هنا بعطيكم المقادير الأصليه وانتوا قللوا كمية السكر اذا تحبون

المقادير

بيض 3 حبات + رشة فانيلا

بيالة شاي زيت

علبة قشطة " وبنفس علبة القشطة نقيس باقي المقادير

سميد علبة ونص

جوز هند نص العلبة

علبة سكر

ملعقة طعام نسكافيه , ملعقة كاكاو بودره , ملعقة بيكنغ باودر

للتغطية / علبة حليب مركز , 2 جالكسي ساده

طحينية لدهن الصينية

 

الطريقة

نخلط المقادير الجافه مع بعض

والسائله مع بعض بعدين نخلطهم جميع ونصبهم في الصينية المدهونه بالطحينيه

وندخلها الفرن نخبزها

بس نطلعها نصب عليه الحليب المركز " الأحسن انكم تدهنوها مجرد دهن بسيط به

ونبشر فوقها الجالكسي وبس تبرد نبشر الجالكسي الثاني

هنا ماخليتها تبرد زين وحتى الثاني ذاب شوي