Archive for 26 أكتوبر, 2010

كيكة باسكن

كيكة باسكن

 

هالكيكه سهله جداً وتعتبر سريعه خاصه اذا استخدمتوا كيك جاهز او سويس رول وشكلها حلو وبارده تسرسح على القلب مثل مايقولون في حر الصيف اسمها باسكن يمكن علشان طعمها يشبه للإيسكريم .. بالعاده اسويها على كيك شوكولاته بس هالمره حبيت اغير الشكل واستخدمت سويسرول الشوكولاته مال امريكانا .. وطلعت النتيجة حليوه

 

المقادير

 

كيك سويسرول ” او كيك شوكولاته تسوونه بالبيت او حتى بيتي كروكر

لخلطة الايسكريم / علبتين كريم كراميل .. ظرف دريم ويب .. علبة قشطة .. 3 ملاعق حليب بودره .. بيالة ماي بارد

شوكولاته مبشور او جالكسي فلوتات او اي نوع تفضلونه .. بالنسبه لي استخدمات حبيبات هيرشي

 

 

الطريقه

 

** نغلف طاسه بالبلاستيك او القصدير

** نقطع السويسرول الى شرايح ونصفها على جدار الطاسه بطريقه مرتبه

** نخلط مقادير الايسكريم في الخلاط حتى يثقل وينفش ونصب نص مقدار الكريمه على السويسرول ونوزع الشوكولاته فوقها واذا حبينا نقطع كيك ونوزع منه شوي ونصب باقي مقدار الكريمه واخر شي نصف باقي السويسرول ونغطيها بالبلاستيك وندخلها الفريز ليله كامله عشان تجمد

** نطلعها قبل التقديم مباشره ونزينها ” بس لاتزينوها نفس التزيين العالمي اللي سويته هنا وخربتها ”

كب كيك النوتيلا بالبندق

كب كيك النوتيلا بالبندق

بما اني صايره شاطره يوم اسوي هالكيك وصورت تقريبا كل الخطوات فما بهدر عليكم وعلى طول نبتدي

المقادير

 

 

 

قالب زبدة بحرارة الغرفه ـ كوب سكر بودره

ـ 2 م ك نوتيلا ـ 2 بيض ـ كوب وربع دقيق

ـ 2 م ك كاكاو بودره ـ نص م ص بيكنغ صودا

ـ 1 م ك بيكنغ باودر ـ علبة زبادي ـ

ربع كوب بندق مجروش ـ 1 م ك فانيلا والأفضل تكون السائله بس وقتها كانت مخلصه مني

 

الطريقة ..

نخفق الزبدة والسكر في الخلاط ثم نضيف البيض بالتدريج والفانيلا

ننخل المقادير الجافه مع بعض ونضيفها للخليط بالتبادل مع الزبادي وملعقتين النوتيلا واخر شي نضيف البندق المجروش بالسباتيولا او الملعقه الخشب

 

نوزع الخليط في قوالب الكب كيك

نخبزه لـ 30 دقيقه في فرن مسخن مسبقاً كالعاده ونجهز في هالاثناء التغطيه اللي بنزين بها

للتغطية ..

مثل متشوفون في الصوره بنحتاج الى .. ربع كوب نوتيلا , نص كوب شوكولاته ” احرصوا تستخدموا نوعية زينه مثل اللي بالصوره ” , نص علبة قشطة , ملعقة زبده ,نصف كوب مارشملو ” هالنوع اخذته على انه موجيلاتين بقري بس للإحتياط اللي تحب ممكن تستخدم بداله عسل ”

نخلط هالمقادير في حمام مائي حتى تذوب وتتمازج وتعطينا لمعه

ونتركها تبرد

نطلع الكيك من الفرن ونتركه يبرد وبعدين ندهنه بخلطة الشوكولاته

ونزينه بحلاوة التوفي المحشي بالبندق مثل اللي في الصوره او حبة بندق حسب رغبتكم

ونصفه في صحن التقديم وبالعافيه

كوفي كب كيك

كوفي كب كيك

لمحبين الكوفي هالكيك باين فيه طعم القهوه بشكل واضح بس ممكن يتخفف منها بزيادة حلاوة الكريمة مثل ماسويت .. الطريقه اللي ماخذتها تختلف شوي في التغطيه والكريمه بحيث تكون طبقة للتغطيه نشرب بها الكيك وكريمة للتزيين .. بس التغيير اللي سويته ان خليت خلطة التشريب هي الكريمة .. بعطيكم الطريقه الاصليه والإختلاف البسيط اللي غيرته وانتوا جربوا اللي تحبون او للتغيير جربوا الاثنين ..

المقادير ..

4 بيضات _ كوب ونص سكر

نص كوب زيت _ كوبين دقيق

1 م ك بيكنغ باودر _ 2 م ك نسكافيه

كوب حليب

** نخلط البيض والسكر حتى يميل لونه للأبيض بعدين نضيف الزيت ” ممكن نستبدلها بزبده “

** ننخل المواد الجافه مع بعض ونضيفها بالتناوب مع الحليب وكالعاده لازم نبدأ بالطحين وننتهي به 

** نوزع خليط الكيك في قوالب الكب كيك ونخبزها في فرن مسخن مسبقا على حرارة 350 وبياخذ حوالي نص ساعه ونطلعه ونتركه يبرد

 

للخلطه / علبة قشطة , 2 م ك نسكافيه , 1 دريم ويب , ثلثين اصبع زبده مذوبه ,سكر بودره حوالي الكأس ” تزيدون وتنقصون على حسب ذوقكم في حلاوتها “

** نخلط هالمقادير مع بعض ونعمل فتحات في الكيك ونشرب الكيك بالخلطه

( التغيير اللي سويته اني خليت الزبده بحرارة الغرفه وخفقت المقادير كلها في الخلاط حتى انتفشت وصارت كريمه دسمه وزينتها بها واستغنيت عن الخطوه الأخيره )

الخطوه الأخيره / بعد تشريب الكيك بالخلطه , نخفق كريمه خفق حتى تنفش ونحط عليها ملعقة من خلطة التشريب ونقلبه بالملعقه مو الخلاط حتى مايطلع الهوا من الكريمه وتسيح

ونزين بها الكيك ونرش فوقها شوي كاكاو ..وبالعافيه

Dates & Walnuts cupcake

Dates & Walnuts cupcake

 

هالكب كيك عربي بجداره بس أخذته من موقع أجنبي شكله كان مغري ومميز وجربته والنتيجه كانت ممتازه والشكل أنيق يبيض الوجه مثل مايقولون

 

وهذي الطريقه مع المقادير

بقسمها لكم 3 أقسام للسهوله

1 .. في الخلاط نخلط بالترتيب ( 3 بيضات + ملعقة صغيره فانيلا … ثلاث أرباع كاس سكر أسمر + ثلاث أرباع كاس زيت )

 

2 .. ننخل ( كاس ونص دقيق + 1م ص بيكنغ باودر + 1م ص بيكنغ صودا + 1 م ك دارسين + 1م ص هيل مطحون + رشة ملح صغيره )

ونضيفهم بالتدريج على الخليط الأول في الخلاط

 

3 .. في البلندر نخلط ( كاس تمر منزوع بدون نوى طبعا + نص كاس جوز خشب ” عين الجمل ” + كاس ماي دافي )

ونضيفهم على خليط الكيك ونخلط لين تتمازج المكونات ونوزعها في قوالب الكب كيك ونخبزها في الفرن 20 ـ 30 دقيقه ونطلعها ونتركها تبرد

 

للتوفي / نذوب نص كاس سكر اسمر مع شوووية ماي على النار بعدين نحط عليه علبة قشطة ونزين بها الكب كيك وفوقه حبة جوز

وبالعافيه

المافن المالح

المافن المالح

هالعجينه شفتها مره بالصدفه بحوستي في النت تنفع اذا بتسوون بيتزا ع السريعه بدون تخمير .. خلطتها تكون شبه سائله مثل خليط الكيك وممكت تسوونها في صينيه كامله او على شكل مافن وتستخدموا اوراق الكب كيك بس ماانصحكم بعد تحطون الورق .. لما جربتها به هالمره بعضهم تداخل العجينه مع قوالب الورق … يعني الاحسن تدهنوا صينية قوالب الكيك بالزيت مباشرة افضل .. والحشوه تقدرون تشكلون فيها .. بعضهم استخدمت فيهم كيري وبعضهم جبن شيدر حبيته اكثر بالشيدر وتقدروا طبعا تنوعوا بالاضافات حسب ذوقكم ورغبتكم ..

 

 

المقادير :

1/4 كوب دقيق
1/4 كوب زيت
1/4 كوب ماء
1/4 كوب حليب بودره
1 ملعقه شاي بيكنج بودر
2 بيض
رشة ملح

الحشوة :

زيتون , فليفله , جبن كيري او شيدر , زعتر

 

الطريقه :

نخلط مقادير العجينه في الخلاط حتى تصير شبه سائله مثل خليط الكيك ونوزعها في صينيه الكب كيك بعد ماندهنها بالزيت

نوزع الحشوه ع الخليط ونرش الوجه بالزعتر وندخلها الفرن نخبزها

لين تتحمر بتاخذ نص ساعه او اقل على حسب حرارة فرنكم

وتتقدم بالعافيه مع الشاي

كب كيك جوز الهند

كب كيك جوز الهند

بما انه وايد يحبون كيك جوز الهند وفي الطريقه اللي حطيتها قبل كان لازم نستخدم جوز الهند الرطب وهذا مو متوفر دايم فدورت طريقه ثانيه وجربتها وطلعت حلوه وهشه وطريه وريحتها حلوه وحليب جوز الهند مركز النكهه فيها + الكريمه فيها جوز هند + كرة جوز الهند اللي نزين بها يعني نكهة جوز الهند مو دبل بس الا تربل جربوها وبتعجبكم ..

 

وهذي المقادير بالطريقه

اصبع زبده +كوب سكر
واخفقيهم مع بعض
اضيفي عليه
2 بيض
وشوي فانيلا سايله
وخليها لين تنتفش شوي
اضيفي نصف كوب جوز الهند
وكوب ونص دقيق وملعقه صغيرة بيكنج بودر
بالتبادل مع علبه زبادي بالنسبه لي ماكان متوفر وقتها واستخدمت كاس لبن
جيبي ملعقه حليب جوز الهند وضيفي عليها 3 ملاعق حليب واخلطيه لين يذوب ( هذا في حال كان مسحوق بودره بس اللي كان عندي حليب جوز الهند السائل ماركة فرشلي فااستخدمت 3 ملاعق منه )
وضيفيه على خليط الكيكوزعيه بالقوالب
مانملاها ع الاخر عشان ماتنفش زياده وتطلع من الكب ونخبزها من 25 الى 30 دقيقه

ونطلعها ونتركها تبرد .. لاتستعجلوا عليها مثل ماسويت وتسيح عليكم الكريمه  

 

للزينه //
نخفق كوب كريمه خفق لين تثقل
ونضيف لها ملعقتين سكر ناعم
وملعقتين جوز الهند
وشوي فانيلا
ونقلب
ونزين فيه الكيك بعد مايبرد الكيك

 

وكور جوز الهند
عباره عن:

كاس حليب بودرة
ثلاث ارباع كاس سكر بودرة
كاس جوز هند
علبه قشطه ( ضفت المقدار كامل وحسيتها مايعه شوي فزدت كميه جوز الهند لين حسيتها صارت تنعجن عدل

او تقدروا كل شوي تحطوا قشطه اذا حسيتوها صارت تتشكل مثل العجينه وقفوا )
اعجنيها وكوريها

 


وبالعافيه 

كب كيك المحشي

كب كيك الشوكولاته والمارشملو

هالكب كيك سهل وتقدرون تبدعوا فيه لأن فكرته تعتمد ع التزيين والسر كله

في صلصة الشوكولاته اللي تعطيه طعم مميز والأهم ان الشوكولاته المستخدمه

فيه تكون من نوعيه ممتازه مثل ماقلت لكم من قبل حاولوا لاتستخدموا الا

شوكولاته ممتازه مثل ليندت اللي حاطه لكم صورتها او اي نوع شوكولاته يكون نسبة الكاكاو فيه عاليه من 65 % وفوق وبتلاحظوا الفرق حتى في تذويبها

وابتعدوا تماما عن الجالكسي


المقادير والطريقة:


كيك فانيلا بيتي كروكر او اي كيك تسوونه بالنسبه لي سويت كيكة الزبادي

 

للتزيين:

صلصة الكاكاو:
نصف كوب كاكاو خام في حمام مائي مع ملعقة زبدة،ملعقتين نوتلا
ثم نضيف علبة قشطة وملعقةطعام عسل
ميني مارشملو

 

الطريقة:

ـ .بعد أن يبرد الكب كيك يفرع من الوسط


ثم يحشى بصلصة الكاكاو
ــ يزين بحبات من الميني مارشملو ويمكن نحط فوقهم خطوط من صلصه التوفي