Archive for 29 أغسطس, 2010

بسبوسة الجالكسي

بسبوسة الجالكسي
 

هالبسبوسه صايره موضه السنه وكل مادخل موقع للطبخ تكون موجوده فيه وقررت أخيراً أطبقها بس طلعت حاميه المره الجايه بقلل كمية السكر والحليب المركز بتطلع احلى بوايد أكيد بس هنا بعطيكم المقادير الأصليه وانتوا قللوا كمية السكر اذا تحبون

المقادير

بيض 3 حبات + رشة فانيلا

بيالة شاي زيت

علبة قشطة " وبنفس علبة القشطة نقيس باقي المقادير

سميد علبة ونص

جوز هند نص العلبة

علبة سكر

ملعقة طعام نسكافيه , ملعقة كاكاو بودره , ملعقة بيكنغ باودر

للتغطية / علبة حليب مركز , 2 جالكسي ساده

طحينية لدهن الصينية

 

الطريقة

نخلط المقادير الجافه مع بعض

والسائله مع بعض بعدين نخلطهم جميع ونصبهم في الصينية المدهونه بالطحينيه

وندخلها الفرن نخبزها

بس نطلعها نصب عليه الحليب المركز " الأحسن انكم تدهنوها مجرد دهن بسيط به

ونبشر فوقها الجالكسي وبس تبرد نبشر الجالكسي الثاني

هنا ماخليتها تبرد زين وحتى الثاني ذاب شوي

كودو التوست

كودو التوست
 
 
بنحتاج الى ــ
 
كيس بريد ,, ناخذ شريحتين من البريد ونحطهم فوق بعض ونفردهم بالنشابه لين يصيروا كأنهم قطعة وحده
ونغطيهم بالبيض والبقسما
 

ونقليهم في الزيت وبينتفخوا عندنا

للحشوه / نقلي بصله ونحط فوقها , صدور دجاج مقطع صغار وملح وبهارات , فليفله , ملعقة جبن , ملعقتين قشطة ونرفعها عن النار على طول

ونقطع التوست المقلي الى نصين ونحشيها بالحشوه والخس المقطع

وبالعافيه

فطاير مشكله

فطاير مشكله
 
العجينة المعتمده عندي للفطاير
 
طحين 4 كاسات
ثلث كاس سكر
ثلث كاس زيت
ثلث كاس حليب بودره
ملعقة كبيرة خميره
ملعقة كبيرة بيكنغ باودر
نص كاس ماء
 
تخلط المقادير وتعجن جيداً مالايقل عن 10 دقائق ونتركها تخمر ويتضاعف حجمها
بتشوفوا العجينه وانتوا تشتغلوا فيها مطاطيه مثل المعجون او الصلصال
بس النتيجه بتطلع معاكم ممتازه والشغل عليها في التشكيل حلو
 
سويت منها أشكال
 
فطاير الوردات
 
 
ناخذ كورة صغيرة من العجين ونحشيها بجبنة الكيري ونكورها ونضغط عليها شوي حتى تتسطح بشكل بسيط
ونعمل فتحتات الوردات بالسكين مثل الصوره
 
 
ندهنها بشوية حليب بودره مذوب في شوية ماء يكون غليظ شوي
ونرش في وسطها شوية زعتر أو سماق حسب ماتفضلون وممكن تشكلون
بعضهم زعتر وبعضهم سماق
وهنا قبل لاأخبزهم
 
وهنا فطاير الأقماع والكرواسون
 
 
ماصورت طرقهم لأن أتوقع الكل يعرفهم
 
الكرواسون / نفرد العجينه على شكل دائرة مثل البيتزا ونقطعه مثلثات بعد نفس تقطيع البيتزا
ونحط على طرف المثلث الحشوه ونلف لين نوصل للوسط ونسكر الجوانب وندهنها ونرش عليها سمسم
 
الأقماع / نفرد العجينه على شكل مستطيل ونقطعه خطوط طوليه مثل الشرايط ونلفها على الأقماع
 
 
بعد مانخبزها نطلعها من الفرن ونطلع من داخلها الأقماع ونحشيها بالحشوه اللي نحبها
بالنسبه لي حطيت لبنه في قمع التزيين وحشيتها به
وممكن لبنه وزيتون او لبنه وزعتر الخ
 
 

كفتة البطاطس

كفتة البطاطس
 
 
من الكتقوري اللي حاطتنه فيه فهو طبق سهل وسريع ويمكن يعتبر مقبلات
استخدمت فيه باقي لحمه مفرومه مقليه عندي لطبخه ثانيه وزاد عندي
فحطيت عليه شوية اضافات ولو تحبوا تقدروا تضيفوا عليها جبن تحشوها فيها
او ملعقتين جبن سائل في الخلطه نفسها او تكثروا مقدار اللحم بحيت يكون ظاهر
يرجع لذوقكم الشخصي وفناتكم
 
المقادير وطريقتها
 
لحم مفروم مقلى مع البهارات " ممكن تقلوا له بصله بعد يطلع اطعم
بطاطس مسلوق ومهروس
كزبرة خضراء مفرومه
جزره مبشورة
شوية كركم وملح
 
تخلط المقادير مع بعض وتشكل كرات أو أقراص
وتغمس في البيض والبقسماط وتقلى
وبالعافيه
 
ولااسهل ولااسرع من هيك
 

كنافة البريد بالقشطة

كنافة البريد
 
 
هالكنافة حاطه طريقه لها من قبل في السبيس بمقادير مضبوطه بس هالمره سويتها ببواقي
البريد من طبق ثاني اللي هو توست الكودو وبدل ماارميه كانت فكره حلوه ومفيده
بس غيرت الحشوه عن الطريقه السابقه بعد شوي .. بطريقه شفتها عند منال العالم
واحسها طلعت أحلى كأنها جاهزه وظلت ليوم ثاني طلعت أحلى وأحلى
 
بنحتاج الى ــ
 
كيس بريد او باقي بريد خايفين تنتهي مدته او صار يابس
أصبع زبده مذوبه
 
نطحن البريد في الخلاط الموس " الفود بروسسر " ونصب عليه قالب الزبده المذوبه
ونخلطه عدل .. عذرا ماصورت لكم الخطوات للاطباق الأخيره
 
في صينية بايركس دائريه او صينية شيز الكيك مثل مااستخدمت هنا
نحط نصف مقدار البريد المخلوط بالزبده ونضغطه باليد زين
 
نحط الحشوه اللي هي عباره عن علبتين قشطة نوزعها على طبقة البريد
ونرش عليها جبن موتزريلا
 
وفي قدر صغير نحط كاسين حليب مع ثلاث ارباع الكاس سميد وملعقتين سكر
وممكن تزيدوا حسب ذوقكم ونحركه لين يغلي ويغلظ عندنا يصير مثل المهلبيه
ونصبه فوق طبقه القشطة والموتزريلا ونوزعه عدل
 
ونرجع نحط باقي كمية البريد ونرتبها باليد وندخلها الفرن نحمرها من تحت وفوق
وبس نطلعها من الفرن نتركها تبرد زين قبل مانقلبها ونطلعها من الصينيه عشان ماتتفتت معانا
بس تبرد وتتماسك نقلبها في صحن التقديم
نسقيها بالقطر او الشيره ونزينها بالفستق الحلبي
 
وعليكم بالعافيه
 

ايسكريم باسكن

ايسكريم باسكن روبنز
 
 
هالحلى أسهل حلى بالعالم ادري دايم اقول ليكم هالكلام بس هالمره صحيح
سهل ومقاديره عالميه الكل تكون موجوده عنده والعيارين بيعجبهم
خاصه ان نتيجته حليوه وشكله يواجه كأن متعوب عليه
 
 
بنحتاج الى ــ
علبة حليب مركز محلى
كيري 6 حبات
علبة قشطة
وبسسسسس
 
نخلطها في الخلاط ونصبها في صينيه نغلفها بالنايلون الشفاف حتى نطلعها بسهوله بعدين
 
الإضافات الزياده على كيفكم تضيفوها او تخلوه ساده
 
هنا استخدمت بسكويت اوريو ممكن تكسروه او تخلوه مثل ماهو
 فتحته وشلته الكريمه منه وصفيته في وسط الايسكريم
وتقدروا تبدعوا على كيفكم في الاضافات .. بسكويت شاي مكسر او مكسرات
او حتى فواكه
 
وندخله الفريز ليله كامله يجمد عدل
 
ونطلعه ونقلب الصينيه في طبق ونشيل النايلون عنها ونزينه على حسب رغبتنا
وبالعاااافيه
 
مافيش اسهل من كدا
 

صينية الرز بالخضار

صينية الرز بالخضار
 
 
هالطبق من أكلاتي المفضله <<< اكيد مدام عيش ومكرونات
وسهله وأمي القمر بعد تحبه وامس ماكان لي خلق أطبخ شي وكان باقي نص كيس لحم مفروم
استخدمت امي نصه للشوربة فقلت فرصه اسويها بهالنص الباقي يعني انتوا تقدروا تزيدوا كمية اللحم
وتغيروا في المقادير على ذوقكم والخضار المفضله عندكم
 
المقادير والطريقه
 
 
مثل ماتشوفوا في الصورة
 
رز أمريكي مغسول ومنقوع شوي ومصفى
خضار مقطعه شرائح " بطاطس , طماط, جزر , فليلفه , بصل
وتقدروا تضيفوا خضاركم اللي تحبوها وتقدروا تنقصوا على ذوقكم مثل ماقلت
لحمه مفرومه نقليها مع البهارات
 
للخلطه " ماء يكفي للتغطيه الصينية+ مكعبين ماجي خضار + ملح + فلفل + بهارات مشكله + صلصة طماطم
 
 
ونبدأ في صف شرائح البطاطس في قاعده الصينية وفوقها طبقة الرز الأمريكي
وفوقها شرائح الفليلفه والطماط والجزر وشرائح البصل
واخر شي نحط طبقة اللحم المفروم
عندي ماصارت طبقةاللحم تغطي كامل لأني مااستخدمت وايد مثل ماقلت لكم فوق
وتقدروا تزيدوا عشان تغطي طبقة اللحم كامل الصينية
 
وأخر شي نصب الخلطه لين تتغطى كل الطبقات
ونغطيها وندخلها فرن الشوي او نطبخها ع الفرن حسب صينيتك
 
 
اول شي نغليها على نار عاليه بس تغلي على طول ننزل على النار ونخليها تنشف
على راحتها واذا تحبوها تكون نديه ورطبه
ماتنشفوها 100 % اذا حسيتوها خلاص نشفت عدل وباقي فيها شوي رطوبه شيلوها
عن الفرن وبتظل محافظه على نداوتها
وهذا شكلها اول ماشلتها
 
 
ونغرفها ونزينها بالكزبره المفرومه ونقدمها وبالعافيه