Archive for 20 يوليو, 2010

كيكة المخمل الأحمر

Red Velvet cup cake
 
 
هالكيك كنت أشوفه في برامج الطبخ الأجنبيه المتخصصه بالحلويات بس مامره حطو طريقته
  دايم يجيبون طرق لتزيين كيك الحفلات عليه … بس بالصدفه شفت وحده مسويته … القلوب أطفال
والطريقه ماخذتنها من موقع أجنبي .. وطبقتها بكل الخطوات وطلعت محلاها قمرايه
وطبعا مو لازم تسووها في الكب كيك مثلي تقدرون تسونها كيكه كامله براحتكم
 
~ المقادير ~
 
 
٢ ٢/١ كوب طحين كيك منخول ( طحين الكيك : كوبين ونص طحين ونص كوب نشا تخلصينهم مع بعض زين .. بيصير عندش٣ اكواب من طحين الكيك ) اخذي الكمية اللي تحتاجيها .

 م . ص بيكنج باودر

١ م . ص ملح

( تنخلي الطحين والبيكنج باودر والملح مع بعض )

٢ م . ك كاكاو بودرة غير محلى تخلطينه مع ربع كوب من اللون الاحمر بيصير عندش صبغة ثقيله من اللون الاحمر 

يعني بتحتاجوا غرشة اللون كامله

اصبع زبدة غير مملحة بحرارة الغرفه

١ ونص كوب سكر

بيضتين

١ م . ص فانيليا

١ كوب لبن على حرارة الغرفه

١ م . ص خل ابيض

١ م . ص بيكنج صودا

 
 
~ الطريقه ~
 
نشغل الفرن يسخن ونوزع أوراق الكب كيك في صينية القوالب
 
نخلط الزبده والسكر في الخلاط لمدة 3 دقائق وبعدين نضيف البيض حبه حبه ونضيف الفانيلا
 
بعدين نضيف الصبغه الحمرا 
 
 
ونخلط زين بعدين نضيف بالتناوب الطحين واللبن
 
 
والحين بعد مايجهز الخليط عندنا نسوي الخطوه الأخيره
في طاسه صغيره نحط البيكنغ صودا ونحط عليه الخل وبيبدي يفور وعلى طول نحطه على خليط الكيك
ونخلطه فيه بالملعقه الخشب او المبسط ونوزعه في قوالب الكيك كيك
 

 
واللي ماعندها صواني الكب كيك ممكن تستخدم قوالب الكب كيك القصدير وتحط فيها ورق الكب كيك
 
 
وندخلها الفرن ونخبزها من 20 الى 25 دقيقه ونطلعه من الفرن يبرد
 
 
ونزينه بـ كريم شيز فروستنج
 
مقاديره في الخلاط / علبة جبن فيلادلفينا 200 نخلطهم مع اصبع زبده بحرارة الغرفه
وفانيلا واخر شي نضيف عليهم من 3_ 4 أكواب سكر بودره
وننتبه لما يكون مطلوب في الوصفه سكر بودره او ايسنغ شوجر لازم نستخدم الجاهز مو اللي احنا نطحنه
لأنه مستحيل بيعطينا نفس النتيجه
 
ونعبي الفروستنغ في كيس التزيين ونزين الكيكات .. هنا ماضبط وايد شكل وردة الفروستنغ لأن ماكانت الكريمه بارده وايد
ورشيتهم بشوية سبرنكلز ملون
 
 

 
وشكلها من داخل
 
Advertisements

حلى أصابع البسكويت

حلى بسكويت الأصابع
 
 
هالحلى يشبه الأيسكريم شووي وثقيل يعني يصلح للعزومات وشكله
يواجه مثل مايقولون
 
 
نبدا في المقادير …
 
بسكوت أصابع زي اللي في الصوره بنحتاج 3 علب ,, ممكت تغيرون نوع البسكوت على حسب اللي يعجبكم
الفكره انه يعطي شكل حلو ومميز
 
بسكويت اوريو 3 أكياس اللي فيهم 6 حبات
كيري 12 مربع
علبة جلي ليمون أصفر
علبة قشطة
دريم ويب 4 ظروف
فنجانين حليب بارد
ملعقة أكل كاكاو بودره
 
… الطريقة …
 
 
نرص أصابع البسكوت في صينية بقاعده متحركه
 
 
ونصف في قاعدة الصينية بسكويت اوريو بعد مانفتحه ونشيل الكريمه اللي داخله
 
 
في الخلاط نخلط 2 ظرف دريم ويب مع فنجان الحليب السائل وبس ينفش نزيد عليه علبة قشطة و8 حبات
كيري ونص كمية بودرة الجلي الأصفر وبعدين نصب الكريمه ع البسكوت
ونصف فوقها بسكويت اوريو هالمره ببدون مانشيل الكريمه منه
 
 
الحين في الخلاط نحط بقية المقادير مع ملعقة الكاكاو ونصبهم
وباقي البسكوت نفتته ونرشه ع الوجه ونزينه بالأوريو او البسكوت نفسه او حسب مانحب
 
 
ندخله الفريز ليله كامله واذا كثر بعد زين على زين
ونقدمه
 

حلى اللؤلؤه في الكاسات

حلى اللؤلؤه في الكاسات
 

‫تقريبا نفس حلى اللؤلؤه بتغيير بسيط وفي كاسات
في الأساس الطريقه ماخذتنها تنعمل في صينية
 
… الطريقه والمقادير …
 
الطبقة الأولى / كيك بني مفتت
 
الطبقة الثانيه / في الخلاط كاس بسكوت شاي مطحون + علبة قشطة + 4 كيري + ظرف دريم ويب
واذا تبغي كمية أكبر تحطي المقادير دبل مثلي عشان تسوي لي 12 كاس
 
الطبقة الثالثه / جالكسي مذوب ونخلط معاه علبة قشطة ونخليه كـ طبقه أخيره
ونزينه بالمالتيريز ونبرده في الثلاجه
 
ويقدم
وهنا عشان يبين شكل الطبقات

حلى كاسات التويكس

حلى كاسات التويكس
 
 
جميع أنواع الحلى في الكاسات تصلح ضيافه للعزومات وشكلها أنيق
والأفضل أن تكون في أواني زجاج شفاف كاسات او غيرها
في هذا الحلى .. اساسا هو بارد بس ماادري ماحبيته بارد فحطيته في الفريز
عشان يطلع مثل الايسكريم بس هالشي راجع لكم المهم انه اذا بنقدمه بارد
نخليه وقت كافي في الثلاجه حتى يبرد ويتماسك عدل
 
المقادير والطريقه
 
الطبقه الأولى / كيك بني مفتت نرصه في الكاسات او اذا حبينا صينيه كبيره بايركس ونرش عليه نسكافيه
مذاب في ربع كاس ماي
 
الطبقه الثانيه / في الخلاط 2 ظرف دريم ويب وربع كوب حليب بارد ونخلطه لين ينتفش
ونضيف عليه 2 قشطة و6 حبات كيري ونضيف الخلطه على طبقة الكيك
وندخلها الفريز تتماسك
 
الطبقة الثالثه / في الخلاط 4 تويكس ابو صبعين وعلبة قشطة و2 ظرف كريم كراميل
وظرف دريم ويب مع نصف فنجان حليب سائل نخلطه زين لين ينخلط التويكس عدل
ونصبه في الكاسات كـ طبقه اخيره
 
هنا زينته بالفليك والتويكس
ونبردها أو نجمدها لوقت التقديم
 

رز أمريكي بالخضار

رز أمريكي بالخضار
 
 
الطبخه هذي سريعه من راسي كانت امي مو موجوده في البيت ومافي غدا
وفكرت بشي اسويه لأخوتي ع السريع وكان عندي صحن صدور دجاج
وخربطت الموجود وطلع عندي هذا
 
… المقادير …
 
صحن صدور دجاج مقطع مكعبات
3 كاسات رز أمريكي
بصله كبيرة مفرومه
خضار مشكله مثلجه
طماطه او ثنتين مبشورين
بهارات مشكله وفلفل اسود وملح
 
… الطريقة …
 
نغسل الرز ونصفيه
وفي القدر نحط شوية زيت ونقلي فيه البصل المفروم وبس يصير لونه ذهبي نضيف عليه
قطع الدجاج ونقليهم ونحط عليهم البهارات والفلفل والملح
 
نضيف الطماط المبشور ونحركه 6 دقائق تقريبا وبعدين نضيف الخضار المشكله
ونحرك ع السريع ونضيف عليه الرز ونقلبه دقيقتين
ونحط عليه حوالي 6 كاسات ماء نحركه ونغطيه
ونتركه يغلي بس ينشف الماء شوي ننزل ع النار ونغطيه بالقصدير وغطاء القدر
ونتركه يكمل استواء وينشف تماماً
 
ويقدم مع رشة بشوية كزبرة
 

فطائر البف باستري

فطائر البف باستري
 
 
عجينة البف باستري .. عجينة هشة تصلح لكل الإستخدامات
وسريعه وممكن تطلعوا منها بإفكار حلوه وتصلح للعزومات وتعجب الكل تقريباً
وتستخدم في الحلى والمالح
 
هالمره استخدمتها في فطاير اللحم بس غيرت عن شكلها المعتاد
وحطيتها في صواني الباي الصغيره
 
المقادير والطريقه
 
مربعات عجينة البف باستري واحسن نوع الكرامه
حشوة لحم مفروم بالطريقه المعتاده
وجبن شيدر مبشور
 
ندهن الصواني الصغيره بشششششششويه زيت زيتون وممكن الاستغناء عن هالخطوه
ونرق مربع العجينه حتى يكون حجمه مناسب لتغطيه الصينية
ونفرده داخلها ونقطع الزوايد
ونحط الحشوه ونرش عليها جبن مبشور
ونغطيها بقطعه ثانيه من العجينه مع قطع الزائد
ونعمل في العجينه من فوق فتحة صغيرة بشكل +
وندهنها بالبيض وندخلها فرن حامي
لمدة 10 دقائق او حتى تحمر
 
وتقدم الأفضل وهي ساخنه
 
ملاحظه / يمكن التغيير في الحشوات على حسب رغبتكم
سبانخ .. بطاطس .. خضار .. جبن الخ

كيكة البرتقال

كيكة البرتقال

كيكة خفيفه تصلح للعصريه او الفطور مع الشاي

…. المقادير ….

ثلاث بيضات _ فانيلا

ثلاث ارباع كاس سكر _ ثلاث ارباع كاس زيت

كوب عصير برتقال _ ملعقة من مبشور قشر البرتقال

كوبين طحين _ ملعقة كبيره بيكنغ باودر

 

…. الطريقة ….

 يخلط البيض مع الفانيلا بالمضرب الكهربائي حتى ينفش شوي ثم نضيف المقادير

بالترتيب المذكور ويكون اخر شي البيكنغ باودر ونصب الخليط في صينية الباوند

مدهونه ومرشوشه بالطحين

وتخبز في فرن مسخن مسبقا على درجة حرارة 350 وافران الغاز اتوقع 180

نتركها تبرد وتقدم كما هي او يمكن نرش سكر بودره

وبالعافيه