تكساس فرايز

تكساس فرايز

هالمره  بطريقه ثانيه خذتها من فلكر نجوده هالبنت فنانه على اصول .. وقلت اجربها بما ان المره اللي راحت جربت طريقه ثانيه .. صحيح خطواتها طويله شوي بس بصراحه تستاهل .. صوص الجبن طلع طعمه جييييزي ولذيذ  … البيت عندنا حبوه  .. سويت نفس الخطوات بس استغنيت  عن البيكون البقري اللي من السجق لأن في البيت مانستخدمه  .. بس اللي يحب يقدر يحطه  … وفلفل الهلابينيو المخلل للأسف ماكان متوفر عندي وقتها  بس موجود في الخطوات طريقه بحطها لكم للفلفل … جربوها وان شاء الله تعجبكم

المقادير والطريقه ” كوبي بيست من فلكر نجوده ”  حتى مع الخطوات اللي ماطبقتها

مقسم إلى 3 مراحل
//1//مرحلة البطاطس المقلية//والفلفل الحار//
//2//مرحلة اللحم المفروم//والبيكون
//3//مرحلة الصلصة والجبن//.

بالنسبة للبطاطس طبعا تختلف الكمية على حسب المقدار إللي حابة تعمليه..
لكن نقول إن المقدار هذا راح يكون ل 4حبات بطاطس كبيرة..
المرحلة الأولى((البطاطس)) والفلفل الحار))
المقادير هي..
4 حبات بطاطس كبيرة
6 ملاعق كبيرة دقيق
توابل(فلفل أسود -شطة حارة بودرة -ملح)
الصلصة(4 ملاعق كبيرة زيت زيتون-عصيرنصف ليمونة- شطة- 2ملعقة كبيرةجبة كرافت سائلة)
الطريقة:
نقطع البطاطس شرائح طولية ثم تسلق البطاطس نصف سلقه في قدر ملئ بالماء وبه ملعقة من الملح.. لمدة 10 دقائق فقط..ولازم يكون حجم شريحة البطاطس متساوية وقد بعضها كلها حتى تأخذ نفس الوقت في الطهي..

ثم نصفيها جيدا…
ثم نخلط التوابل مع بعضها البعض جيدا ونضيف لها الدقيق ونتركها على جنب
ونخلط مقادير الصلصة لوحدها جيدا ثم نضع فيها البطاطس ونقلبها جيدا ثم نشيل البطاطس الشرائح ونقلبها في خليط التوابل مع الدقيق وإنتبهوا لاتلصق في بعض..
ثم إبدأوا بقليها في زيت غزير….حتى تنضج((تماما مثل البطاطس المقليه))
وبكذا نكون إنتهينا من البطاطس…

 

الفلفل الحار//
مقادير
حبة فلفل أخضر حار
ملعقة زيت سمسم أو زيت زيتون

الطريقة :
قطعي الفلفل لشرائح دائرية رفيعه وشوحيها لثواني في الزيت ثم صفيها

المرحلة الثانيه //مرحلة اللحم المفروم // والبيكون//

المقادير
نحتاج لكوب من اللحم المفروم النيئ
توابل((ملح وفلفل وشطة وفلفل حار بودرة وإكليل الجبل))
ملعقتين من الزيت

ولعمل البيكون البقري نحتاج إلى حبتين من السجق مقطعه إلى شرائح رفيعه..

الطريقة:
أولا السر المهم هو خلط التوابل جميعها جيدا مع اللحم وهو نيئ,
ثم,نضع الزيت في القدر ونبدأ نشوح اللحم المفروم حتى ينضج معنا..ونتركه على جنب..
وبالنسبة للبيكون نتبل شرائح السجق بالشطة الحارة فقط..ثم نقليها جيدا في زيت غزير حتى تنشف..وتترك على جنب

 

المرحلة الثالثة//مرحلة الصوص والجبن//

المقادير //
نحتاج إلى
كوب ونصف من الحليب
شريحتين من البصل
((نفور الحليب والبصل جيدا حتى يفور ونتبله بالملح والفلفل ونضع عليها بعض الشطة ونتركه مدة 10 دقائق ثم نصفيه))

نصف كوب من جبن التشيدر الأصفر أو كرافت المبشورة
3حبات جبن كيري مهروس
ملعقة صغيرة من الماسترد أو الخردل..

في قدر صغير نضع ملعقة من الزبدة حتى تذوب ونضع فوقها ملعقة من الدقيق وتقلب جيدا لمدة دقيقة حتى تصبح ذهبية
ثم نبدأ بسكب الحليب المتبل بالبصل بالتدريج فوق الزبدة والدقيق مع الخفق السريع حتى تتكثف عندنا الخلطة وتصبح مثل الكريما ثم نضع عليها الجبن التشيدر والكيري والالخردل وتقلب جيدا حتى يذوب الجبن وتمتزج النكهات..

كذه نكون إنتهينا من الوصفة ونجي لترتيبها في الطبق..
أولا نرص البطاطس
ثم نضع فوقها اللحم المفروم
ثم شرائح البيكون
ثم شرائح الفلفل الأخضر الحار
ثم نصب فوقها القليل من صوص الجبن((القليل جدا))
ونترك الباقي في طبق أو زبدية صغيرة بجانب طبق التكساس فرايز

كساديا الدجاج المشوي

كساديا الدجاج المشوي

طبعا الطريقه تقدروا تتلاعبوا فيها على ذوقكم  ممكن تغيروا الحشوه تسووها حشوة دجاج فاهيتا وبتصير كساديا فاهيتا مثل اللي في تشيليز .. وهالمره استخدمت خبز التورتيلا اللي من بنده حسيته اطرى  حبيته في الشغل اكثر من اللي خذته من السيفوي .. يشبه كثير لخبز التوتيلا اللي اسويه في البيت …

 

 

المكونات والطريقه

صدور دجاج نتبلها بـ ببريكا وشوووية بهار مشكل وصوص الصويا وصلصة الستيك او صوص الباربكيو أفضل شي بس ماكان موفر عندي وقتها

ونشوي الدجاج ع الشوايه او في الفرن بس تتحمر نشيلها وندهنها بمسحه خفيفه من صلصة الستيك او صوص الباربكيو او اللي يحب ممكن مايونيو وكتشاب او واحد منهم يرجع لذوقكم

ونتركها ترتاح مانقطعها على طول وهي حاره حتى ماتفقد عصارتها وتنشف

 

للكساديا نجهز خبو التورتيا , بطاطس مقلي او مشوي , جبن  شيدر مبشور ,  صوص الباربكيو او صلصة الستيك , والصدور اللي شويناها

ونبتدي نقطعها شرايح بهالشكل

ونحط قرص التورتيا وفوقه الجبن المبشور ونرتب الدجاج والبطاطس فوقه ونوزع عليهم شرايح فلفل اخضر حار

ونرش بالملعقة شوي من صوص الباربكيو او الستيك

نغطي الحشوه بقرص ثاني من خبز التورتيا وندهن الصاج او مقلى التيفال بشووووية زيت بسيطه ونحمرها حتى يذوب الجبن ويتحمص الخبر  ونرفعها ونقطعها ارباع

ونقدمها مع السور كريم اذا كان متوفر  وبالعافيه

تكساس فرايز

تكساس فرايز

هالطريقه خذتها من منتدى شمواه وعذرا نسيت اسم صاحبتها .. في البيت لما جربتها لهم عجبتهم شخصيا لأني مو مغرمه باللحوم ماجربتها ولا جربت الاصليه اللي في مطعم تشيليز

بس جربوها انتوا وحكموا واللي جرب يقارن بين الاثنين

المقادير

بطاطس ودجر ” على حسب حجم الصينيه اللي عندك تستخدمي الكميه ” شخصيا استخدمت كيس ونص من الصغار

لحم مفروم , بصل مفروم ناعم , فليفله  حلوه مقطعه صغير , طماطم مقطع صغير ” كلهم يكونوا في نفس الحجم

بهارات وفلفل أحمر بودره , وملح  مكعب ماجي خضار  , ملعقتين صلصة الطماط

جبن قشقوان

الطريقه

نحط البطاطس في صينيه وندخله الفرن نحمره بدون زيت  ونجهز في هالوقت اللحمه

نحطها في مقلاه ع النار ونتركها حتى ينشف مايها ونحط بعدين شوية زيت مقدار ملعقتين بس ونقليها ونحط فوقها البصل والطماط والفليفله والبهارات ومكعب ماجي خضار وملعقه ونص صلصه الطماطم ونلقبهم مع بعض  ونتركهم على نار هاديه حتى تتسبك مع بعض

نطلع البطالطس من الفرن ونحط نص الكميه في الصينيه وفوقها خلطة اللحم

ونصف عليها شرايح جبنة القشقوان ونغطيها تماما وبعدين نحط باقي كمية البطاطس وفوقها طبقة ثانيه من شرايح جبنة القشقوان

وندخلها الفرن  حتى يسيح الجبن تماما

نطلعها والافضل تقدم ساخنه وفوقها فلفل أخضر حار او فلفل هلابينو مخلل

وبالعافيه

كيكة البونتي

كيكة البونتي

هالكيكه  روعه للي يحبو شوكولاته باونتي وجوز الهند ” فديت روحهم الغاليين اللي يحبو جوز الهند ” وبارد ومنعش في هالحر .. جربناه في اخر قعده لنا مع البنات في بيت صلحيه .. هالقمر كله مدلعتنا ومدللتنا تسلم ايدها .. وخذنا الطريقه منها .. جربوا واحكوا ..

بس الفرق هي طبقت الكيك خلتها مفتته ورصتها مثل الجيز كيك .. بس لما سويتها خليتها مثل ماهي .. وسويت خطأ  اني حطيت طبقة جوز الهند قبل ماتبرد الكيكه فصارت رطبه من تحت بس عموما ماخرب ع الطعم ..  واذا تبغوها مثل الاييسكريم تقدروا تستبدلوا الطبقه الاخيره بشوكولاته مذوبه مع قشطه وبردوها في الفريز >> ماجربتها بس اتوقع بتطلع تمام  ..

المقادير + الطريقه

الطبقة الأولى .. كيكة بنيه تقدروا تسووها او تستخدموا كيك بيتي كروكر شوكولاته  نخبزها ونتركها تبرد

الطبقة الثانيه… في قدر نحط ” كاسين جوز هند + كاسين حليب + 3 ملاعق سميد + نص كاس زيت + بياله سكر ” ونحركه ع النار بس يغلي ويثقل نرفعه ونصبه على طبقة الكيك ونترتبه بالملعقه

الطبقه الثالثه .. في قدر نحط  ” ظرف كريم كراميل + فنجان سكر + علبة قشطة + 3 ملاعق كاكاو + كاس حليب ” نذوبهم على النار وبس يغلي نرفعه ونصبه بحذر على طبقة جوز الهند وندخله الثلاجه يبرد  لحين وقت التقديم وبالعافيه

لف المعجنات

اليوم جايبه لكم طرق للف الفطاير والمعجنات .. شفتهم في المنتديات وطبقتهم بس يبغى لهم بال … سويت بهم السويس رول واصابع القرفه وفطاير لحم

طبعاً انتوا تاخذوا الفكره وتطبقوها على الحشوه اللي تبغوها سواء حلى او مالح

لأصابع القرفه .. نفرد العجينه وندهنها بالزبده بس نخلي الاطراف بدون دهن عشان تلزق على بعضها  ونرش عليها السكر البني والقرفه

نطبقها على بعض  بهالطريقه  ونقطعها  بشكل طولي

ونلف كل مستطيل بشكل متعاكس

وهذا شكله بعد الخبز حطيت عليه صوص الهيرشي  شوكولاته والكراميل

تقدروا تستخدموا نفس الفكره  على حشوة الزعتر

~~~~~~~~

“2 “

هالطريقه  بالأساس  اللي خذتها من عندها كانت حاطه حشوه مالحه لبنه وزيتون او زعتر نسيت بس كنت مسويه سويس رول وقلت اجربها  طلعت حليوه بس صارت عملاقه لأني

ماقسمت العجينه بس انتوا خذوا الفكره وضبطوها  لأن شكلها حلو

نفرد العجينه بشكل مستطيل كبير وندهنها بالحشوه اللي نبغاها ونلفها رول مثل مانسوي السينابون ونقطع بالسكين بس بدون مانوصل للطرف  بهالشكل

ونبتدي نعاكس الحلقات وحده نخليها مثل ماهي والثاني نرفعها للجهه الثانيه بهالشكل

ونخبزها طبعا المفروض ماوريكم نتيجتي لأن مثل ماقلت لكم طلعت عملاقه عندي  بس للأمانه  بضحي واوريكم :P

~~~~~~~~

“3 “

وهذي للفطاير والتسميه من عندي  .. نسيت  وماصورت الا خطوه وحده بس ان شاء الله تكون  واضحه تبين الفكره

نحشي الفطاير بشكل كوره عادي  وبعدين ناحذ قطعتين صغار  من العجينه نلفها على شكل اسطواني  ونجدلها  بلف الخيطين على بعض  بهالشكل

وناخذ الجديله اللي عملناها ونحطها مثل التاج فوق  الفطيره وندخل الاطراف تحت حتى ماتنفتح اذا خبزناها .. ان شاء الله وضحت الفكره  وتبين من النتيجه النهائيه

شوارما الدجاج العربي

شوارما الدجاج العربي

هالوصفه خذتها من هجر من زمان وكل مره أاجل تجربتها لأن عندنا بالبيت طريقه للشوارما معتمدينها وسبق حطيتها في المدونه بس كتغيير قلت

اجربها امس تخيلت انه طعمها ممكن يكون اقرب للشوارما من الطريقه اللي اسويها .. وفعلا الطريقه حلوه وسهله وسريعه  ماتاخذ وقت الا بسلق الدجاج

المقادير

دجاجه مسلوقه ومقطعه بالأصح مفتته .. شخصياً استخدمت صدور دجاج

ملح , بهارات مشكله , كمون وفلفل أسود

ربع كاس عصير ليمون

ربع كاس زيت زيتون

بصله  مقطعه جوانح ” اختياري مو ضروري تحطوها

الطريقه

بعد تفتتيت الدجاج  المسلوق  “نخليه مثل الخيوط”  نحط عليه  البهارات ونصب فوقه عصير الليمون وزيت الزيتون ونتركه 10 دقايق يتبل

وفي المقلى نحط شرايح البصل الرقيقه ونشوحهم ع السريع  في ملعقتين زيت ونحط الدجاج فوقهم  ونحركه ونتركه على نار هاااديه نص ساعه

ونشوحه بالاخير ونرفعه عن النار ويكون جهز عندنا نحطه بالسندويتشات بالطحينيه والاضافات اللي نحبها

ميني تارت التوفي

ميني تارت التوفي

هالحلى عطتني طريقته من زمان  صديقتي الصدوقه اشراف  من سنين واول ماجربته الكل طاح في غرامه بس وقفت ماسويه وامس واني ادور في دفاتري

لقيته ورجعت سويته ولازال الكل يقع في غرامه .. بس حسيت هالمره طعم الحليب باين شوي  يمكن استعجلت عليه او بسبب نوعية الحليب بالعاده استخدم نستله المركز المحلى

هالمره استخدمت نوع ثاني فيلور  .. المهم ندخل ع الوصفه

المقادير والطريقه

للتوفي / علبة حليب مركز محلى كبيره

نحطها العلبه وهي مسكره  في قدر  ونغطيها بالماي وعلى النار ونتركها 3 ساعات وكل ماحسينا الماي نقص نرجع نزيد ه ..

لعجينة التارت  /  اصبع زبده بارد مقطع مربعات , كوب طحين , نص كوب سكر بودره , رشة ملح , صفار بيضه , فانيلا سائله

نعجن المقادير مع بعض .. عندي طلعت الزبده شوي لين فااضطريت ازيد شوي طحين .. نجمع كورة العجين ونغلفها بالبلاستيك ونتركها ترتاح 10 دقايق في الثلاجه

ونطلعها وناخذ مقدار كورة صغيره من العجينه ونوزعها بالاصابع في قوالب صينية الكب كيك او الميني كب  ” المقدار الواحد يسوي تقريبا 12 حبه في صينية الكب الحجم العادي

ونعمل فيها فتحات بالشوكه 

\

 .. ونخبزها لين تتحمر ع الاطراف ونطلعها ونتركها تبرد تماما

 وبعدين نقلب الصينيه ونطلع قوالب التارت

نفتح علبة الحليب المركز بعد ماشلناها من على النار وتركناها تبرد بتكون صارت توفي وثقلت ونعبي التوفي في كيس بلاستيك او قمع ونوزعه في التارت

 

ونزينه بالمكسرات .. احب الفستق لأنه يعطيه لون حيوي 

ويقدم مع القهوه

Follow

Get every new post delivered to your Inbox.